ഇനി കാളക്കുതിപ്പിന്റെ കൊടിയേറ്റം നിക്ഷേപകർ അറിയേണ്ട കാര്യങ്ങൾ

Rajesh EA
18 Apr 2026

ലോകമെങ്ങുമുള്ള ഓഹരി വിപണികൾക്ക് ആശ്വാസം പകർന്ന് ഹോർമുസ് കടലിടുക്ക് പൂർണമായി തുറക്കുമെന്ന് ഇറാന്റെ പ്രഖ്യാപനം. വെടിനിർത്തൽ കാലയളവിൽ എല്ലാ ചരക്കു കപ്പലുകൾക്കുമായി സമുദ്ര പാത തുറക്കുമെന്ന് ഇറാൻ വിദേശ കാര്യമന്ത്രി അബ്ബാസ് അരാഗ്ചി അറിയിച്ചു. ഇതോടെ അടുത്ത വാരം ഇന്ത്യൻ ഓഹരി വിപണിയിൽ കാളകൾ കെട്ടു പൊട്ടിക്കുമെന്ന് ഉറപ്പായി.

കുതിച്ചുയർന്ന് യു.എസ് ഓഹരി വിപണി

ഇറാന്റെ പ്രഖ്യാപനം വന്നതോടെ യു.എസ് ഓഹരി വിപണികൾ പറന്നു കയറി. ഡൗ സൂചിക 1,000 പോയിന്റുകളും, എസ്&പി 500 പോയിന്റുകളും കുതിച്ചു കയറി. ഇതിന്റെ അനുരണനങ്ങൾ ലോകമെങ്ങുമുള്ള ഓഹരി വിപണികളിൽ വരും ദിവസങ്ങളിൽ പ്രകടമാകുമെന്നാണ് വിലയിരുത്തൽ.

ഇന്ത്യൻ ഓഹരി വിപണി

പശ്ചിമേഷ്യൻ യുദ്ധത്തിന് ശമനമാകുന്ന അന്തരീക്ഷത്തിൽ മികച്ച നേട്ടത്തിലാണ് വെള്ളിയാഴ്ച്ച, വാരാന്ത്യത്തിൽ ഇന്ത്യൻ ഓഹരി വിപണി ക്ലോസിങ് നടത്തിയിരിക്കുന്നത്. നിഫ്റ്റി 50 സൂചിക 156.80 പോയിന്റുകൾ (0.65%) ഉയർന്ന് 24,353.55 പോയിന്റുകളിൽ ക്ലോസിങ് നടത്തിയപ്പോൾ ബി.എസ്.ഇ സെൻസെക്സ് 504.86 പോയിന്റുകൾ (0.65%) നേട്ടത്തോടെ 78,439.54 പോയിന്റുകളിൽ വ്യാപാരം അവസാനിപ്പിച്ചു. നിഫ്റ്റി ബാങ്ക് ഇൻഡെക്സ് 479.30 പോയിന്റുകൾ കയറി 56,565.70 പോയിന്റുകളിലെത്തി.

നിഫ്റ്റി ലെവൽസ്

നിഫ്റ്റിയുടെ പ്രതിദിന ചാർട്ടിൽ വലിയ ബുൾ കാൻഡിൽ രൂപീകരണമാണ് നടന്നിരിക്കുന്നതെന്ന് എച്ച്.ഡി.എഫ്.സി സെക്യൂരിറ്റീസ് സീനിയർ ടെക്നിക്കൽ അനലിസ്റ്റ് നാഗരാജ് ഷെട്ടി പറഞ്ഞു. തൊട്ടു മുമ്പത്തെ സെഷനിലെ ബെയർ കാൻഡിലിനെ കവർ ചെയ്യുന്ന കാൻഡിലാണ് രൂപപ്പെട്ടത്. സാങ്കേതികമായി ഇത് മിനിമലായ തിരുത്തൽ സാധ്യതകളുടെയും, ശക്തമായ അപ്ട്രെൻഡ് വികാരത്തിന്റെയും സൂചനയാണ്.

നിലവിൽ നിഫ്റ്റിക്ക് 24,400 നിലവാരത്തിലാണ് കനത്ത പ്രതിരോധമുള്ളത്. ഈ ലെവൽ മുകളിലേക്ക് ബ്രേക്ക് ചെയ്താൽ 24,800 പോയിന്റുകൾ വരെ റാലി നടക്കാം. ഇവിടെ നിന്ന് വീണ്ടും ബ്രേക്കൗട്ട് ലഭിച്ചാൽ സൂചിക 24,100 പോയിന്റുകൾ വരെ കയറാനുള്ള സാധ്യതകളുള്ളതായും അദ്ദേഹം വിലയിരുത്തുന്നു

നിഫ്റ്റി സൂചിക 24,600-24,800 പോയിന്റുകൾ വരെ ഉയരാനുള്ള സാധ്യതകളാണുള്ളതെന്ന് റെലിഗെയർ ബ്രോക്കിങ് സീനിയർ വൈസ് പ്രസിഡന്റ് അജിത് മിശ്ര പറഞ്ഞു. സൂചികയിൽ 23,900-24,100 നിലവാരത്തിൽ ശക്തമായ പിന്തുണയുള്ളതായും അദ്ദേഹം പറഞ്ഞു.

ബാങ്ക് നിഫ്റ്റി ലെവൽസ്

ബാങ്ക് നിഫ്റ്റി സൂചിക കഴിഞ്ഞ ഏതാനും ആഴ്ച്ചകളായി 56,384-55,842 സോണിൽ കൺസോളിഡേറ്റ് ചെയ്യുകയായിരുന്നെന്ന് അനലിസ്റ്റുകൾ വിലയിരുത്തുന്നു. ഈ ബാൻഡിന്റെ ഏതെങ്കിലുമൊരു ദിശയിലേക്കുള്ള ബ്രേക്ക്, ആ വശത്തേക്കുള്ള റാലിക്ക് കാരണമായേക്കും. സൂചികയിൽ 56,900-57,000 നിലവാരങ്ങളിലാണ് തൊട്ടടുത്ത പ്രതിരോധമുള്ളത്.

ഇവിടെ നിന്ന് ബ്രേക്കൗട്ട് ലഭിച്ചാൽ 57,400 പോയിന്റുകൾ വരെ സൂചിക ഉയരാം. ഇവിടെ നിന്ന് അടുത്തതായി 57,800 നിലവാരം വരെയും ഹ്രസ്വകാലാടിസ്ഥാനത്തിൽ കുതിപ്പ് തുടരാം. താഴെ നിലകളിൽ 56,100-56,000 സോണിലാണ് നിർണായകമായ പിന്തുണയുള്ളതെന്നും അനലിസ്റ്റുകൾ വിലയിരുത്തുന്നു

വിവരങ്ങൾ സമാഹരിച്ചത് malayalam.economictimes.com ൽ നിന്നും

Article credits goes to malayalam.economictimes.com

Disclaimer അറിയിപ്പ് : മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. ഷെയർ വിലയിൽ മുമ്പ് ഉണ്ടായിട്ടുള്ള ഉയർച്ച ഭാവിയിൽ ഉണ്ടാകണം എന്നില്ല.സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഷെയർ മാർക്കറ്റ് ഇൻ മലയാളവും ലേഖകനും ഉത്തരവാദികളല്ല.